ကျနော့်အိမ်မှာ ရုပ်မြင်သံကြား (TV) တလုံးရှိတယ်။ (TV)မှာ ရတဲ့ လှိုင်းကတော့ အများကြီးပဲ။ တခြားလှိုင်းတွေကတော့ ကိုယ့်ဘာသာ စကားမဟုတ်လို့ နားမလည်ဘူး။ နေ့လယ်နေ့ခင်း ပျင်းလို့ရှိရင် ကိုယ်ကောင်းကောင်း နားလည်တဲ့ မြန်မာ့ အသံလွှင့်ဌာန MWD/MRTV က လွှင့်တဲ့ ကိုရီးယားဇာတ်လမ်းတွဲပဲ ထိုင်ကြည့်ပါတယ်။ ယခုတလော သတိထားမိတယ်၊ စစ်ကားတွေ တနေ့တကား ပုံမှန်လွှင့်ပေးလာပါတယ်။ စစ်ကားဆိုလို့ နိုင်ငံခြားက စစ်ကားတွေ မဟုတ်ဘူးနော်။ မြန်မာပြည်က ဒါရိုက်တာလည်း သူတို့ပဲ၊ ဇာတ်ညွန်းရေးသူလည်း သူတို့ပဲဖြစ်တဲ့ နအဖ စစ်ဘီးလူးတွေရဲ့ စစ်ကားပဲဖြစ်ပါတယ်။ သရုပ်ဆောင် တွေကတော့ နအဖ ရဲ့ ကောက်ကျစ်ယုတ်မာတဲ့ ဥာဏ်နီဥာဏ်နက်တွေနဲ့ ပြည်သူတွေကို လှည့်စား၊ မျက်စိလည်အောင် အထင်မှားအမြင်မှားဖြစ်အောင် ၀ါဒဖြန့်ချိရေးကားတွေမှာ သရုပ်ဆောင်ပေးနေသူက ကိုရွှေမင်းသား၊ မင်းသမီးချောလေးတွေပဲ ဖြစ်ပါတယ်။ပြည်သူပြည်သားများခင်ဗျား… နအဖ စစ်အာဏာရှင်တို့ ဘာအကြံညစ်ထုတ်ဦးမလဲ။ သိပါတယ်.. ဇာတ်ကားတွေထဲမှာတော့ တပ်မတော်သား တွေက ရောင်စုံသုပုန် (နအဖ အခေါ်)များကို အသက်နဲ့လဲပြီးတိုက်ရသည့်အပြင် ပြည်သူလူထုတွေကို ကာကွယ်စောင့်ရှောက်ရသေးတယ်၊ တိုင်းပြည်အတွက် အသက်ပေးဆပ်နေရတဲ့ တကယ့်ပြည်သူ့တပ်မတော်လို အခန်းဖြစ်ပါတယ်။ သူတို့စစ်တပ်မရှိလျှင် အဲဒီ သောင်းကျန်းသူ တွေရဲ့ လုပ်ရပ်ကို သိတယ်မဟုတ်လား။ သူတို့(နအဖစစ်တပ်)ရှိလို့ သက်သာတဲ့သဘောမျိုး ပြည်သူတွေကို ပြချင်နေတာဖြစ်ပါတယ်။ တဖက်မှာတော့ သောင်းကျန်းသူ(နအဖ အခေါ်)တွေကတော့ မူးယစ်ရမ်းကား၊ မိန်းမပျိုတွေကို မုဒိန်းကျင့်၊ ရွာကို မီးရှို့ဖျက်ဆီး၊ လူတွေကိုသတ်တဲ့ အခန်းပဲဖြစ်ပါတယ်။ သောင်းကျန်းသူ(နအဖ အခေါ်)တွေရဲ့ ရိုင်းစိုင်းတဲ့အပြုအမူတွေကို ပြည်သူတွေ ယုံလာအောင်၊ မုန်းတီးလာအောင် ပီပီပြင်ပြင် သရုပ်ဆောင်ခိုင်းပြီး၊ သူတို့ဘက်ကို ပြည်သူတွေ ပါလာအောင် သူတို့ (နအဖ) စစ်တပ်က ယဉ်ကျေးသိမ်မွေ့ပြီး တိုင်းသူပြည်သားတွေကို ချစ်မြတ်နိုးတဲ့ တပ်မတော်လို့ ပြည်သူတွေ နားလည်လာအောင် နအဖ စစ်အာဏာရှင်အကြိုက် လိုက်နေတဲ့ သရုပ်ဆောင် မင်းသားမင်းသမီးတွေကို အသုံးချကာ သရုပ်ဆောင်ခိုင်းပြီး ပြည်သူတွေကို လိမ်လည်စည်းရုံးနေပါတယ်။ အဖိနှိပ်ခံ ပြည်သူတို့ရေ…. သွားပြီမယုံမိပါစေနဲ့နော်. တပ်ကြပ်ကြီးလုပ်တဲ့လူက သူတော်ကောင်းဟန်ဆောင်ပြီး အိမ်ရှေ့မှာ အမိုး (အမေ)နဲ့ ယဉ်ယဉ်ကျေးကျေးစကားသွားပြောနေစဉ် တပည့်လုပ်တဲ့လူက အိမ်နောက်ဖေးမှာ အမိုး (အမေ)ကြက်ကို ခိုးစားနေတာ နအဖ စစ်အာဏာရှင်ရဲ့ တပ်မတော်သားတွေဖြစ်ပါတယ်။ ဒါကြောင့် အညှာလွယ်မယ်ဆိုရင်ဖြင့် ပြည်သူလူထုတို့ အိမ်နောက်ဖေးက ထမင်းအိုး ပျောက်သွားဦးမယ် သတိထားနော်။
တကယ့်တော့ သောင်းကျန်းသူဟာ နအဖ စစ်အာဏာရှင်ဖြစ်နေတယ်ဆိုတာ ဟောလိဝုဒ်မင်းသားကြီး ရမ်ဘိုဇာတ်ကားကို ကြည့်ရင် သိပါတယ်။ ဒါပေမယ့် တကယ့်လက်တွေ့မှာ အဲဒီရမ်ဘိုဇာတ်ကားထက် ကြမ်းသေးတယ်။ ကျနော်တို့ ကြုံတွေ့ခဲ့တဲ့ နအဖ စစ်တပ်ရဲ့ လုပ်ရပ်ကတော့ ဇာတ်ကားထဲကလို ပြည်သူတွေကို ကာကွယ် စောင့်ရှောက်တာ မဟုတ်ပါဘူး။ သူတို့ (နအဖ) သရုပ်ဆောင်ခိုင်းတဲ့ အကြောင်းအရာနဲ့ တိုင်းရင်းသားနယ်မြေတွေမှာ တိုင်းရင်းသားပြည်သူတွေကို အကြမ်းပတမ်းဖိနှိပ်၊ သတ်ဖြတ်နေတဲ့ တကယ့်လက်တွေ့အဖြစ်အပျက်တွေနဲ့ တလွဲကြီးပါပဲ၊ ဒါဟာ ပြည်သူတွေကို မျက်စိလည်အောင် လိမ်လည်သရုပ်ဆောင်ခိုင်းနေတာ ဖြစ်တယ်။ ပြောင်းပြန်ဖြစ်အောင် သရုပ်ဆောင် ခိုင်းလိုက်တာဖြစ်ပါတယ်။ တချို့ မော်ဒယ်မလေးတွေကလည်း အနားမရပါဘူး။ ဟိုဘက် တံတားကို ပြေးသရုပ်ဆောင်ရ၊ ဟိုဘက် ဆည်မြောင်းကို ပြေးသရုပ်ဆောင်ရနဲ့ မြန်မာပြည်ဟာ ခေတ်မီတိုးတက်လာတဲ့ အကြောင်းပေါ့။ တည်ဆောက်ထားတဲ့ တံတားကြီး၊ ဆည်မြောင်းကြီးတွေကို နောက်ခံထားပြီး ဘာမသိ၊ ညာမသိနဲ့ ကိုယ်လုံးလေးကို ဟိုပစ်ဒီပစ်နဲ့ သရုပ်ဆောင် ပေးနေလိုက်ကြတာ တက်တက် ကြွကြွပါပဲ။ ဘုန်းကြီးဦးဆောင်တဲ့ စက်တင်ဘာ သံဃာ့အရေးအခင်းမှာတော့ အဲဒီမျက်နှာတွေ တယောက်မှ မတွေ့မိပါဘူး။ ပေါင်းလုပ်မှ စားရတယ်ဆိုတာကို အခုမှ သိသွားတယ်။ ပေါင်းမလုပ်ဘူးဆိုရင် မစားရတဲ့အပြင် အခုလောက်ဆိုရင် အင်းစိန်ထောင်ထဲ ရောက်လောက်ပြီပေါ့။ ဒါမျိုးတော့အဖြစ်ဘယ်ခံမလဲနော်။ ပေါင်းစားလို့ ရနိုင်သလောက်ကတော့ ပေါင်းစားလိုက်ဦးမယ် မဟုတ်လား ကိုရွှေမင်းသားမင်းသမီး၊ မော်ဒယ်လေးတို့ရေ…….။ ဒါပေမယ့် ဘယ်လိုပဲ ပေါ်လစီကားတွေ ရိုက်ရိုက်၊ ရုပ်မြင်သံကြားမှာလည်း လွှင့်လွှင့်ပါစေ၊ တံတားတွေ ဆည်မြောင်း တွေရှေ့မှာ မော်ဒယ်လေးတွေ သရုပ်ဆောင်ပေးနေပါစေ သေချာတာကတော့ မြို့နေလူထုတွေက နအဖ အာဏာရှင်ကို နားလည်လာမှာ၊ ယုံကြည်လာမှာ မဟုတ်ပါဘူး၊ ဘာဖြစ်လို့လဲဆိုတော့ ၂၀၀၇ ခုနှစ်၊ စက်တင်ဘာ အရေးအခင်းမှာ နအဖ အာဏာရှင်တွေရဲ့ သရုပ်အမှန်ကို သိလိုက်ရလို့ပဲ။ နအဖ အာဏာရှင်ကို ပိုလို့တောင် မုန်းတီးရွံရှာနေဦးမယ်ဖြစ်ပါတယ်။ တိုင်းရင်းသားနယ်မြေက လူထုတွေကတော့ ဇာတ်ကားတောင်ကြည့်စရာမလိုတော့ဘူး။ လက်တွေ့မှာ အကောင်လိုက်မြင်နေရ၊ ခံနေရပြီသားပဲ ဖြစ်တယ်။
နအဖ ဒါရိုက်တာလုပ်ပြီး သရုပ်ဆောင်ခိုင်းနေတဲ့ ဇာတ်ညွန်းထဲက အကြောင်းအရာတွေဟာ နအဖ အာဏာရှင်တွေက ပြည်သူတွေကို လှည့်စားနေတယ်ဆိုတာ ကိုရွှေမင်းသားမင်းသမီးတို့ ကောင်းကောင်း သိရောသိရဲ့လား၊ ဒါမှမဟုတ် သိလျက်နဲ့ ပြည်သူတွေရဲ့ ဒုက္ခဆင်းရဲမှုတွေကို လျစ်လျူရှုပြီး သရုပ်ဆောင်ပေးနေတာလားလို့ မေးချင်ပါတယ်။ နအဖ စစ်ဘီးလူးတွေဆီက မင်းသားမင်းသမီးချောလေးနဲ့ မော်ဒယ်လေးတို့ ဘာကိုမျှော်ကိုးနေတာလဲ ကျနော်အရမ်းသိချင်ပါတယ်။ ပြည်သူချစ်တဲ့ အနုပညာသမားကနေ ပြည်သူမုန်းတဲ့ နအဖ ကို ကပ်စားတဲ့ အနုပညာသမား ဖြစ်နေပြီဆိုတာ ကိုရွှေမင်းသားမင်းသမီး၊ မော်ဒယ်လေးတို့ တကြိမ်တခါမှ မစဉ်းစားမိဘူးလား။ တကယ့်မြို့နေပြည်သူတွေ၊ တိုင်းရင်းသားတွေ ခံစားနေရတဲ့ ဖြစ်ရပ်မှန်တွေကို မသိဘဲ နအဖ စစ်အာဏာရှင်တွေရဲ့လိုရာကို ကြိုးဆွဲတဲ့အတိုင်းကနေရတဲ့ ရုပ်သေးရုပ်လို လိုက်သရုပ်ဆောင်ပေးမနေပါနဲ့လို့ ပြောချင်ပါတယ်။
ဆက်လက်ရေးသားဖော်ပြပါမည်
By YNO
